Charta qua Ermengardis notum facit se dare monasterio Cluniacensi, pro anima viri sui Ulrici, mansum cum servis in villa Miserei.
Notum sit omnibus fidelibus, tam presentibus quam futuris, quod ego Ermengardis do, pro remedio animę senioris mei Ulrici et meę, de terra juris mei unum mansum in villa, nomine Miserei, cum omnibus apendiciis quę ad ipsum mansum pertinent, tam in silvis quam in pratis, vel vineis, aquis aquarumque decursibus, Sancto Cluniacensis cenobii Petro, apostolorum principi, perpetualiter possidendum. Do etiam servum qui in eo habitat, nomine Rotfredus, cum conjuge nomine Raimbergia, et filiis eorum, unum, nomine Giraldum et alium, nomine Landoenum, cum omni posteritate eorum. Quam donationis cartulam ego Ermengardis firmavi et firmare his testibus precepi. S. Ulrici, Beraldi, Bernardi, Hugonis, Rotfredi, Giraldi, Wichardi, Duranni, Ottonis comitis. Hactum est hoc regnante Rotberto rege. Scriptum manu Oggerii.